Minggu, 25 November 2012

Acara Pesta Natal 25 Desember 2012



ACARA PESTA 1
PARNINGOTAN HATUTUBU NI TUHAN JESUS
NA PARJOLO
Selasa, 25 Desember 2012
 

01.     Pangaradeon              : Parhalado masuk tu Gareja, jongjong di langgatan
    mangadophon ruas.   U : Uluan; H : Huria; PH : Parhalado

02.    Manghamauliatehon Asi ni Roha ni Debata
U     : Huria ni Tuhanta! Ari na balga do sadarion parningotan di ari hatutubu ni Tuhanta Jesus Kristus. Alani tapuji jala tahalashon ma Jesus naung tubu i.
H     : Ari on do na jinadihon ni Debata Jahowa. Marolopolop jala marlas ni roha ma hita disi. Hujangkon hami ma Jesus naung tubu i, rap ma hita manghalashon hatutubu na i.
PH   : Mangasahon asi ni roha ni Debata hupasahat hami tu hamu: “SELAMAT HARI NATAL MA DIHAMU”
H     : Mangasahon asi ni roha ni Debata hudok hami ma: Selamat Hari Natal ma nang di hamu.      (mulak ma parhalado tu hundulan)
U     : Naeng pungkaonta ma Pesta Natal sadari on, taparade ma rohanta, jumolo ma hita martangiang di bagasan rohanta be mangido hasasaor ni Tondi Parbadia tu ganup hita.
.....................martangiang dibagasan roha....................

03.    Marende BE No. 57 : 1 – 3 “Nunga jumpang muse”
Ø  Nunga jumpang muse ari Pesta i, Hatutubu ni Tuhanta Jesus i, Tuat do Ibana sian surgo i Mebat tu hita on, Hasangapon di Debata, dame,dame ma di jolma. Las ni roha ni Debata Hajolmaon muse.
Ø  Beta, ale dongan tu Betlehem i, Itasomba ma Dakdanak na disi, Na tinongos ni parasiroha i Debata Ama i, Hasangapon di Debata, dame,dame ma di jolma. Las ni roha ni Debata Hajolmaon muse
.......................... Jongjong ...........................
Ø  Sombanami ma di Ho na tubu on, Ho siboan dame tu portibion, Sai pasaorhon ma tu rohanami on DameMi o Jesus, Hasangapon di Debata, dame,dame ma di jolma. Las ni roha ni Debata Hajolmaon muse.

04.    Votum – Introitus
U     : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on.
H     : Amen.
U     : Mandok mauliate ma hamu di Ama i, naung mangaroro hita sian gomgoman ni haholomon, jala na paunsathon hita tu bagasan Harajaon ni Anak haholongan ni rohaNa.
H     : Mauliate ma di Ho o Debata, ai hatutubu ni Jesus AnakMi paunsathon hami sian haholomon tu hatiuron, sian hamatean tu hangoluan.
U     : Nunga tubu dihita sada posoposo, dilehon tu hita sada Anak, pampe tu abaraNa do sogot harajaon, jala bahenonna GoarNa:
H     : Sipartahi halongangan, Ulu balang ni Debata, Ama saleleng ni lelengna, Raja ni hadameon.
U     : Martangiang ma hita! Sai hupuji hami ma GoarMu, Ale Debata Ama, parasi roha na sumurung. Ala marroha Ama do Ho tu hami pardosa on. Dilehon Ho do AnakMu na sasada i, Tuhan Jesus Kristus, asa dapotan hangoluan hami marhite sian Ibana. Sai patogu ma rohanami marhite Tondi Parbadia, asa manahan hami sahat ro diujungna, mangoloi Jesus Kristus Tuhannami. Amen.
........................... Hundul ............................


05.    Marende BE No. 48 : 1 “Ria Ma Hita Sasude”
Ø  Ria ma hita sasude mamuji Debata. Girgir ma parendenta be Ai i do na tama Ai i do na tama

06.    Patik
U     : Hata ni Debata na gabe patik di pestanta sadarion, i ma na tarsurat di Johannes 5: 1-3, tajaha ma marsorinsorin:
H     : Ganup na Porsea, Jesus do Kristus, i do naung tubu sian Debata, jala ganup na mangkaholongi Ibana na manubuhon, haholongan ni i do nang na tubu sian Ibana.
U     : Sian on do taboto, naung holong rohanta di angka anak ni Debata: molo tahaholongi Debata jala taradoti patikNa.
H     : Ai on do holong ni roha di Debata; molo taradoti patikNa. Ndada na dokdok patikNa i.
U     : Ale Tuhan Debata sai pargogoi ma hami mangulahon na hombar tu patikMi. Amen.

07.    Marende BE No. 51: 2 “Tole Puji Ma Tuhanta”
................ Jongjong.............
Ø  Dosa dohot hamatean Bolis dohot hamagoan Talu, ala naung diboan Jesus hangoluan i

08.    Manopoti Dosa
U     : Tatopoti ma dosanta na godang i tu Debata, tapaunduk jala tapaserep ma rohanta, martangiang ma hita: Ale Tuhannami jala Debatanami na di banua ginjang, parasi roha na sumurung mida hami. Huparhatutu jala hutopoti hami do dosa dohot pangalaosionnami na godang i dijoloM.
H     : Tatap ma hami marhite asi ni rohaM jala sesa ma dosanami sudena.
U     : Nunga dipapatar Ho asi dohot holong ni rohaM, marhite Tuhan Jesus Kristus. Alai jotjot ndang tarida i dibagasan ngolunami. Jotjot do hami ganggu songon halak na so marhaporseaon. Sipata mura hami marsak jala mandele songon halak na so marpanghirimon. Jotjot ngolunami ndang tau tiruan, di panghataion, nang haporseaon. Alani ro hami ti joloM, sai sesa ma dosanami.
H   : (Mangendehon) BE No. 182 “Haholongan na badia”
Ø  Husolsoli do rohangku Na gok dosa i tongtong, Ai godang ariaringku Na hubahen ambolong
U     : Ale Amang, na mardosa do hami dompak Ho, nang maradophon angka dongannami. Tongtong do nian hubege hami hataM na mandok: Asa mian hami di bagasan holong ni roha. Alai ndang huhaholongi hami Ho sian nasa roha, gogo nang pikirannami. Nang dongannami ndang huhaholongi hami songon dirinami.
H   : (Mangendehon) Sai asi rohaM Tuhan ....3x
U     : Ale Amang, asi ma rohaM di hami. Pargogoi ma hami unang lalap hami binahen ni portibion. Jotjot do hami manimbil sian lomo ni rohaM. Jotjot do hami marsigantung tu gogo nang pikirannami. Asi ma rohaM, sai sesa ma dosanami!
H   : (Mangendehon) BE No. 182 “Haholongan na badia”
Ø  Alani tungki rohangku Jongjong di adopanMi, Sai asi rohaM Tuhanku Sesa nasa dosangki.
U     : Ale Tuhan, ra diida Ho do ragat ni dosa na huulahon hami. Godang masa korupsi mambahen torop halak madabu tu hapogoson. Godang na manegai hutan, mambuati hau, asal ma godang pangomoanna. Ima mambahen gabe ro banjir, tanah longsor jala sega lingkungan hidup. Gabe torop angka na mate jala agoan arta. Adong na mambahen hagaoran marhite angka teror bom dohot mambahen kerusuhan. Na deba tahe adong na manutup paksa, mangarupakhon dohot manutung angka bagas joroM.
H     : Ale Tuhan marpamuati ma rohaM di nasida, unang laluhon rimasMu tu bangsonami on, sai pauba ma roha nasida.
U     : Mardosa do nang angka dongannami, na manggadis narkoba asal mandapot pangomoan nasida, hape gabe torop korban angka anakhonnami na umposo.
H     : Ale Tuhan marpamuati ma rohaM di nasida, togu ma nasida mulak tu Ho.
U     : Ale Tuhan Debata Amanami, Ho do patupahon hasesaan ni dosa di hami halak na dangol on. Sai asi ma rohaM di hami. Lehon ma tu hami TondiM na badia i asa unang ganggu rohanami di asi ni rohaM. Sai pahot ma haporseaonnami laho manggotaphon nasa dosa dohot roha portibion. Asa hupasahat hami dirinami tu Ho gabe pelean na mangolu jala na badia. Marhite Tuhan Jesus Kristus Tuhannami.
H     : Amen.
U     : Bagabaga ni Debata taringot tu hasesaan ni dosanta: songon on do hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do sipalua ho. Hasangapon ma di Debata na di ginjang.
U+H : Amen
....................... Hundul .......................

09.    Marende BE No. 605 : 1 “Las ma roham Tuhanta ro”
Ø  Las ma roham Tuhanta ro, Gumomgom sasude ungkap roham, Jangkon rajam marende ma sude, Marende ma sude, marende, Marende ma sude.

10.    Epistel : Psalmen 147 ; 1 – 6
U     : Halleluya! Ai denggan do endehononhon Debatanta, ai hasudungan do Ibana tama papujipujion.
H     : Jahowa do na pauli Jerusalem, Ibana na papunguhon halak Israel angka na mampar i.
U     : Ibana pasabam angka parroha bojok, jala dililiti angka bugangnasida i.
H     : Ibana umbilang torop ni angka bintang, dijou do goarnasida sudena.
U     : Timbul do Tuhanta i jala pargogo situtu, ndang habilangan parbinotoannai.
H     : Jahowa pahehehon angka na nirupa, dipatungki tu tano ianggo angka parjahat i.
U     : i ma sahat na, Martua do angka na tumangihon Hata ni Debata, jala na umpaeopsa. Amen.

11.    Marende BE No. 605 : 3 – 4 “Las ma roham Tuhanta ro”
Ø  Bura binaen ni dosa I, marujung ma disi, Ai nunga ro Mesias I, mamboan dame I, Mamboan dame I, mamboan, mamboan dame i.
Ø  Ibana do Rajanta I Parasiroha I, Natigor I, na bonar I, parholong roha I, Parholongroha I, parholong, parholongroha i.

12.    Manghatindanghon Haporseaon

13.    Pasahat Ucapan Selamat Natal
ü Mewakili Sekolah Minggu (Gr. SM)    :...........................
ü Mewakili Naposo Bulung                    :...........................
ü Mewakili Ruas Ina                               :...........................
ü Mewakili Ruas Ama                            :...........................
ü Mewakili Parhalado                            :...........................
ü Mewakili Pangaranto                          :...........................


14.    Marende BE No. 615 : 1......... “Tarbege surusuruan marende”
(Pelean 1 a & 1 b)
Ø  Tarbege surusuruan marende mansai uli. Angka dolok dohot rura, gok do saringar na i.
Reff. Sangap ma sangap ma di Tuhan  sangap ma sangap ma di Tuhan.
Ø  Las roham ale parmahan, nunga tubu Kristus I Rap marende ma hamuna, pasangaphon Raja i. Sangap ma……
Ø  Borhat ma hamu marnida, tu huta Betlehem I, Somba Kristus Sipalua, naimbaru tubu i. Sangap ma……
Ø  Ida ma di panggagatan, Sipalua na ro i. Sigomgomi parluhutan, langit dohot tano i. Sangap ma……

15.    Jamita : Lukas 2 : 8 – 11

16.    Marende BE No. 62 : 1.......... “Halalas ni Roha Godang”
(Pelean II tu Departemen Diakoni Sosial HKBP)
Ø  Halalas ni roha godang, na hubaritahon on. Nunga tubu Sipalua di hita jolma on. Hasangapon di Debata, laos dame, dame, dame ma di jolma. Lomo ni roha ni Debata do hita jolma on.
Ø  Ai saborngin on do binsar bintang di na holom i. Sumondangi hagolapon, na di rohanta i. Hasangapon di Debata, laos dame, dame, dame ma di jolma. Lomo ni roha ni Debata do hita jolma on.
Ø  Tuhan Jesus hadomuan, na disuru Debata, Na pasaehon sude dosa di dolok Golgata. Hasangapon di Debata, laos dame, dame, dame ma di jolma. Lomo ni roha ni Debata do hita jolma on.
Ø  Sai sondangi ma rohangku, ale Tuhan Jesus i. Asa dohot au maruli, di hatutubuMi. Hasangapon di Debata, laos dame, dame, dame ma di jolma. Lomo ni roha ni Debata do hita jolma on.

17.    Manghangoluhon Hata ni Debata
U     : Nunga Dipapatar Debata Jahowa asi ni rohaNa dohot holong ni rohaNa, di nanilehonNa AnakNa na sasada i tu hita jolma na di pardangol on. Alani i jangkon ma Ibana tubu dibagasan ngolum.
H     : Ale Tuhan, lehon ma di hami tondi hagogoon, asa margogo hami manjangkon Jesus i, tubu dibagasan ngolunami.
U     : Antong, papatar ma holong dohot asi ni roha ni Debata dibagasan ngolum. Gabe parasiniroha ma hamu, songon tanda naung ditanda jala dijalo hamu asi ni roha ni Debata.
H     : Ale Tuhan, lehon ma dihami Tondi hagogoon, dohot Tondi haholongon, asa tutu hami parasi roha jala parholong roha tu angka dongannami be.
U     : Antong nunga dibege hamu, Hata ni Debata sadarion. Radoti ma i, jala bahen hamu ma i gabe sinjatamuna, asa tartaluhon hamu portibion.

Tangiang Pelean – Tangiang Ale Amanami – Pasupasu